Acts 10

Pita Kᵾn Koniliyas Raⱡ

1Sesariya kona ila wu Koniliyas ni, wu ti murum. Wu ei, Rom Gapman ei nga el wu mormin mbᵾ nga wu rᵾⱡaip kat mbi tek, “Itali Rᵾⱡaip” nᵾtmᵾn kᵾⱡ nokundrum. 2Wu ei kᵾn, wote elim nga wamp mbo kᵾⱡ pora, Got nga mundmong endᵾk, Got nga mbi paka rondᵾk etmin. Jura wamp kurpa mbᵾ, rᵾk rᵾk tᵾpa rapundpa, Got kᵾn rᵾk rᵾk atinga ropa itim. 3Ui ti kun, kona ant ei 3 kilok epindama elinga, ur kump mel etpa kᵾndrᵾm mel, Got nga anggelo ti ndi omba, nimba mel, “Koniliyas!” nitim. 4Wote mundmong etpa, anggelo ni, nem nem kandpa, nimba mel, “Nuim ye! Namba uⱡ em?” Anggelo ndi, punt ropa, nimba mel, “Nim nga atinga rorᵾn, wote tᵾpa rᵾpndi kongun kai etᵾn uⱡ nimbᵾ, Got ndi, numan ngumba, pilpa kai pilpa morum. 5Akup ant ila, met Jopa kona ila, wu Saimon Pita ni, ei morum kona ila, wu mat tᵾkᵾn mundana, kurᵾk pinggil. 6Wu ei, wu Saimon ni ti, kng kau kᵾng mbᵾ nga kongun etᵾm wu ei nga manga ei, num ᵾldᵾ ila anggᵾtᵾm kona ila mba morum,” nitim. 7Wote Anggelo ni, kelpa puⱡnga kᵾn, Koniliyas ndi, elim nga kongun wu ralt kᵾn, el wu ti, Got kᵾn mondpa pili wu ti kᵾn, wi ropa rukᵾr tᵾpa mondpa, elim kᵾn anggelo ei ndi, ik nitim nimbᵾ mel, timan ropa ngumba, wote wu Koniliyas ndi, wu kᵾⱡ, Jopa kona ila, tᵾpa mundrum.

Pita Ndi, Ur Kᵾmp Mel Etpa Kundrum

9Puk kᵾn, nombuⱡa ruk ting ila ting manga petᵾng. Pek kona ranggᵾⱡnga, Jopa kona peng ila, ekit purung. Purung ui ni kᵾn, rᵾnggilmᵾ Pita ni, manga im ila, oⱡa mba atinga rurum. 10Wote, Pita kump kun kuⱡpa, rᵾng mat namp nimba pitim ni, rᵾng mbᵾ kokila kaⱡina mel, Pita ndi, ur kᵾmp mel etpa kᵾndrᵾm. Ni kᵾn, muⱡ kona kumba tilinga, muⱡ mbal para na, ni mel ti, muⱡ punt tᵾmbᵾkak kᵾⱡ ila ambuⱡpa, ya mᵾi ila mana ndurum. 12Muⱡ ei nga rukᵾr orunga, kundrum ei, kimbuⱡa na, kng, kui kᵾi na, mel rakra mbᵾ pitim. 13Ik ti ndi omba, Pita kundpa nimba mel, “Pita nim oⱡa molkᵾn, mel kᵾⱡ rok koikᵾn nun ka!” nitim. 14Wote Pita ndi, nimba mel, “Nuim ye! Na ndi, ei mel kapⱡa iti nᵾtimp. Ei nambuⱡ emel, na ndi, mel ⱡar mul mbᵾ kᵾn, wote mel eng nui nᵾni mbᵾ, na nui nandᵾr, mon!” nitim. 15Ik nitim ni ndi, aldpa Pita kundpa, nimba mel, “Got ndi, mel ti kai nᵾtᵾm ei, nim ndi, kit ni nᵾni mon!” nitim. 16Uⱡ ei mel etpa, raldika elinga kᵾn, wote muⱡ mbal mel ni, muⱡ kona ila oⱡa titim.

17Pita ur kᵾmp mel elpa kᵾndrᵾm ni nga puⱡ ei, pilip mbi nduimp nimba murum. Ni kᵾn, Koniliyas ndi, wu tᵾpa mundrum ni kᵾⱡ, Saimon nga manga ei, kandᵾk tᵾk ok, paⱡa ekit orunga keta puⱡ puⱡ ila anggilik morung. 18Kona ila molk, tᵾk rukᵾr nduk, wi rok waldᵾk, nᵾk mel, “Wu Saimon Pita, nᵾtmᵾn wu ei ila morum ei?” nᵾtᵾng. 19Ni kᵾn, ur kᵾmp mel etpa kᵾndrᵾm uⱡ ni nga, Pita ndi, puⱡ ei, pilip mbi nduimp nimba moⱡnga, wote Muⱡnga Wingti ei ndi kundpa, nimba mel, “Nim pᵾn ye! Wu raldika kat nim kurᵾk onmᵾn. Ei nga, nim numan ou ndukᵾn, pili napᵾlkᵾn, tᵾkᵾrkᵾn mana pukᵾn, wu kᵾⱡ kᵾn rup rokᵾn pi! Wu kᵾⱡ, na ndi, tᵾp mundᵾⱡmba onmᵾn,” nitim. 21Wote Pita ndi, mana mba, wu kᵾⱡ, kundpa nimba mel, “Na enim kurᵾnmin wu ei na! Enim nambuⱡ emel ong?” nitim. 22Wu kᵾⱡ ndi, punt rok, nᵾk mel, “Tᵾn nga el wu kuimbal Koniliyas ndi, tᵾpa munduⱡnga onmᵾn. Wu ei, Got nga mundmong etpa, Got nga mbi paka rondpa, uⱡ kun kai mbᵾ etᵾm. Jura wamp mbᵾ ndi, wu ei, tᵾk ou nduk etmin. Wote, anggelo ti ndi omba, nim wu ei nga elim nga mang kona ila okᵾn, ik mat kundᵾk, nᵾn nitim ei nga onmᵾn,” nᵾtᵾng. 23I nilingina kᵾn, Pita ndi, wu kᵾⱡ, rumbᵾⱡ ei kᵾn mukᵾr tᵾpa, elim nga manga ila ur pimᵾn, nitim. Utᵾma orunga, Pita tᵾpa kun etpa, wu kᵾⱡ kᵾn rᵾp ropa purum. Wote, Jopa kona ila mondpa pili wamp mat, kunda ku, rᵾp rok purung.

Pita Koniliyas Nga Mang Kona Purum

24Wote, puk ting manga pek, utᵾma orunga, Sesariya kona ila ruk purung. Ei kᵾn, Koniliyas ndi, elim nga wamp mbo tenda na, manga keta kup wamp na mbᵾ, ruk tᵾpa, mou ropa, Pita nokundpa murum. 25Pita manga nila mukᵾr mbi nimba elinga, Koniliyas ni, Pita kandpa tᵾpa, kump puⱡ ila mura koptᵾm ropa mondpa, mbi paka ruimp nimba elinga, wote Pita ndi, Koniliyas etpa, tᵾpa oⱡa mondpa, nimba mel, “Oⱡa anggila! Na nim mel ku, ei ka!” nitim. 27Pita ndi, Koniliyas kᵾn ik nimba moⱡpa, manga nila murᵾk mba kᵾndrᵾm ei, wamp minal mou rok morung. 28Wote wamp mbᵾ, kundpa nimba mel, “Enim pora, pilik ketmin ni, Jura wamp nga mi ik ei ndi, Jura wamp ti, wamp rᵾⱡaip elpa kᵾⱡ kᵾn nondpa, puk kup etᵾk, iting ei mon nimba petᵾm. Wote Got ndi, na uⱡ ti, ora ndupa, wamp mbᵾ nga, wamp ti, ⱡar morum ni nᵾni mon! Wote wamp ti, eng norum ni nᵾni, mon! 29Ei nga, enim na rung mundung ei kᵾn, na enim nga ik ei, kum tep teng ndup unt. Akup na ndi, enim waldᵾp kᵾn, enim na nambuⱡ emel, rung mundung nda?” nitim.

30Wote Koniliyas ndi, punt ropa, nimba mel, “Rumbᵾⱡ tᵾmbᵾkak omba puⱡnga kᵾn, epindama ant 3 kilok, na mang kona ila atinga rop moⱡmba, wu ti, muⱡ mbal kurmᵾⱡᵾ eng nui kat ti raⱡpa, na mur ila urum. Wote, wu ei ndi, na kundpa, nimba mel, ‘Koniliyas! Got ndi, nim nga atinga rokᵾn, wote wamp kurpa mbᵾ, tᵾkᵾn rapundkᵾn etᵾn uⱡ nimbᵾ, pilpa kandpa mbi ndurum. 32Ei kᵾn, wamp mat tᵾk mundana, met Jopa kona ila wu Saimon ni ti, mbi tek, Pita nᵾtmin ei, petᵾm kona ila pangga! Wu Saimon ei, kng kau kᵾng mim etᵾm wu ei nga manga met, num ᵾldᵾ ila, manga tᵾma mba morum,’ nitim. 33Ik ei pilip kᵾn, na nim wun nᵾmp rung mundunt ei kᵾn, nim teng ndukᵾn un ei, uⱡ kai ti in. Akup, tᵾn wamp pora, Got nga kuimp keta ila ombun nokundpᵾn mormun. Ei nga, Nuim ei ndi, nim namba ik mat mbo rondum mbᵾ, tᵾn kundkᵾn nana pilamin!” nitim.

Pita Ndi, Koniliyas Nga Manga Ila Got Nga Ik Ei Nitim

34Wote Pita ndi, ik puⱡ mondpa, nimba mel, “Na akup pilip mbi ndunt ei kupa, Got ndi, wamp mbᵾ pora, to tenda ila mint kᵾmp tᵾtᵾm. 35Wote, wamp rᵾⱡaip elpa elpa nant mbᵾ nga wamp ti, elim Got nga mundmong etpa, uⱡ kun mbᵾ mint etpa moⱡum wamp ei, Got ndi, kandpa kapⱡa nimba pᵾtᵾm. 36Enim pilik mormin ei, Got nga nombuⱡa rung ik ei, Isrel wamp kᵾⱡ kᵾn urum ni ka! Nombuⱡa rung ik ei ndi, Jisas Kraist kᵾn moⱡpa kundi uⱡ, rᵾnang ik kai kᵾⱡ, Got ndi, tᵾn kᵾn ngumba mundrum. 37Enim Jon ndi, wamp nu tindi uⱡ ei nga puⱡ ei, nimba mel ngurum ei, pilik mormin. Ui ei kᵾn, Jisas nga rᵾnang ik ei, Galili na Jura kona mbila puⱡ mondᵾk nilingina, para purum. 38Ik ei, Nasaret wu Jisas nga ik ei, Got ndi, wu ei to ropa tᵾpa, Muⱡnga Wingti ngumba ronduⱡ ngurum. Wote, Got wu ei kᵾn murum uⱡ ei ndi, kona elpa mbila mba, uⱡ kai mbᵾ etpa, Seitan ndi, tepa murum wamp mbᵾ etpa titim. 39Wote tᵾn ndi, wu ei nga itim uⱡ mbᵾ nga Jura kona na, Jerusalem kona mbila kundpᵾn, nimbun pora ndurmᵾn. Wu ei, nde peta ila pendᵾk roⱡina, kurum. 40Wote, rumbᵾⱡ raldika omba puⱡnga, Got ndi, Jisas ⱡoporpa tᵾpa, oⱡa monduⱡnga, omba pena ila pitim. 41Got ndi, elim wamp mbᵾ pora, ora ndui nandrᵾm mon! Wote elim ndi, tᵾn to ropa tᵾpa, elim nga ik ei nᵾtmᵾn wamp mbᵾ, ora ndurum. Wote, elim on kona ila rut nimba murum. Ei kᵾn, tᵾn elim kᵾn rᵾng na, nu na mbᵾ nomp etmin. 42Wote, Jisas elim ni, Got ndi, wamp kui kont mbᵾ, kᵾmp tᵾmba ei nga tᵾpa, kuimbal mundrum. Ei nga, tᵾn ndi, wamp mbᵾ, ik ei tᵾk pena ila pendᵾk, mbo indᵾi, nitim. 43Painui wu mbᵾ ndi, unt wu ei nga nᵾndᵾk mel kᵾn, wamp nam ti ndi, Jisas nga mbi ei, mondpa pilim ndam, wu ei nga mbi ronduⱡ ila, elim nga uⱡ kit mbᵾ, pendpa kelmba,” nitim.

Wamp Rᵾⱡaip Elpa Mbᵾ, Muⱡnga Wingti Tᵾtᵾng

44Pita ni, ik mbᵾ nimba moⱡnga, ik kum tek morung wamp nimbᵾ, Muⱡnga Wingti ei mana omba, wamp mbᵾ kᵾn murum. 45Ei kᵾn, Jura mondpa pili wamp mat, Pita kᵾn Jopa kona ila kunda molk, orung ni kᵾⱡ, Got ndi Muⱡnga Wingti ei, wamp rᵾⱡaip elpa kᵾⱡ kᵾn, kun oi ndupa ngurum ni, Jura wamp kᵾⱡ, pilik min ngᵾn mundrung. 46Ei nambuⱡ emel, wamp rᵾⱡaip elpa mbᵾ, ik nuim kan elpa elpa mbila, tek nᵾk, Got nga mbi paka rondrung. Ei nga, Pita ndi, nimba mel, “Wamp kᵾⱡ, akup Muⱡnga Wingti tᵾnmin ei, tᵾn kitip kᵾni wu kᵾⱡ titmin, ei mel ku tᵾnmᵾn. Ei kᵾn, wamp nam ti ndi, kapⱡa ya wamp kᵾⱡ, nu ti nᵾteing nᵾk, mi pinding?” nitim. 48I nimba kᵾn, wamp mbᵾ kapⱡa, Jisas nga mbi ila nu teing nitim. Wote, wamp nimbᵾ ndi, Pita waldᵾk, en enim kᵾn muⱡangga, rumbᵾⱡ mat omba pangga nᵾtᵾng.